कांग्रेसले ७७ वटै जिल्लामा केन्द्रीय प्रतिनिधि पठाउने (को कहाँ सूचीसहित)
पार्टी संगठन सुदृढीकरणका लागि जिल्लाको नेतृत्व गर्ने नेताको नाम सार्वजनिक
सत्तासीन नेपाली कांग्रेसले पार्टी संगठन सुदृढीकरणका लागि ७७ वटै जिल्लामा केन्द्रीय नेतालाई पार्टी प्रतिनिधिका रुपमा तोकेको छ । जिल्लाहरुमा खटाइएका नेताहरुमा अधिकांश पार्टी केन्द्रीय सदस्य र केहीमा पूर्व केन्द्रीय सदस्यलाई पनि खटाइएको छ । तर सांसद भएका केन्द्रीय सदस्यलाई भने कुनै जिल्ला पठाइएको छैन ।
पार्टीले केन्द्रबाट खटाइएका प्रतिनिधिहरु पहिलो चरणमा साउन २० देखि ३० सम्म आन्तरिक पार्टी संगठन सदृढीकरणका लागि परिचालित हुने छन् । त्यसपछि दोस्रो चरण भदौ १० देखि २४ गतेसम्म जिल्ला जिल्लामा रहने छन् ।
जिल्ला जाने केन्द्रीय प्रतिनिधिहरुले पहिलो चरणमा पार्टीको आन्तरिक संरचनाको काम गर्नेछन् । जसमा कार्यसमिति अपूर्ण छ भने पूर्णता दिने, बैठक बसाल्ने, त्यसबाट समग्र जिल्लामा पार्टीको अवस्था र तल्लो तहको संगठनबारे रिपोर्टिङ लिनेलगायत काम गर्ने छन् । त्यस्तै आन्तरिक विवाद रहेमा समाधान गर्ने, जिल्ला सम्मेलन नभएकामा सम्मेलनको तिथिमिति तोक्ने, नयाँ क्रियाशील सदस्यता वितरण, नवीकरणजस्ता कार्य हुनेछन् ।
त्यस्तै गरी पार्टी केन्द्रीय समिति बैठकले तोकेको सेवा दल गठनको प्रक्रियाका लागि केन्द्रीय सदस्यहरुले सहजीकरण गर्नेछन् । यससम्बन्धी निर्णय अघिल्लो बैठकमै भएको थियो ।
दोस्रो चरणअन्तर्गतको कार्यक्रम भदौ १० देखि २४ गतेसम्मको अभियानमा नागरिकसँग जोडिएर केन्द्रीय सदस्यहरुले गतिविधि सञ्चालन गर्नेछन् । यसलाई पार्टी समुदायमा आधारित राष्ट्रव्यापी अभियान नाम दिएको छ । जसमा केन्द्रीय प्रतिनिधिका रुपमा जिल्ला आएकाहरुले समुदायमा गएर प्रत्यक्ष कुराकानी गर्ने र उनीहरुको कुरा सुन्ने छन् ।
