काठमाडौँ । जनता समाजवादी पार्टी नेपालले संघीय संसद्का दुवै सदनमा भूमिसम्बन्धी अध्यादेशलाई समर्थन नगर्ने भएको छ । मंगलबार सिंहदरबारमा बसेको संसदीय दलको बैठकले प्रतिनिधिसभा र राष्ट्रिय सभा दुवैमा भूमिसम्बन्धी अध्यादेशमा सरकारलाई समर्थन नगर्ने निर्णयमा पुगेको हो ।
तर जसपाले सरकारले ल्याएका अन्य पाँच अध्यादेशमा भने जसपा नेपालले सरकारलाई समर्थन गर्ने पार्टीका प्रथम उपाध्यक्ष राजकिशोर यादवले बताए। भूमिसम्बन्धी ऐनमा २०७८ माघ २८ गते गरिएको आठौं संशोधनले गरेको भन्दा पनि दायरा फराकिलो हुने गरी भूमिहीन सुकुम्बासी, भूमिहीन दलित र अव्यवस्थितिलाई जग्गा वितरण गर्न र ठूला रियल स्टेट व्यवसायीलाई लाभ पुग्ने गरी अध्यादेश ल्याइएको भन्दै जसपाको आपत्ति रहेको उनले प्रस्ट पारे।
सत्तारूढ कांग्रेस र एमालेले राष्ट्रिय सभाको अंकगणित सुनिश्चित नभएकाले सरकारले ल्याएका ६ वटा अध्यादेश संसद्को कार्यसूचीमा राखेको छैन। जसपा नेपालको समर्थनबिना कुनै पनि विधेयक राष्ट्रिय सभाबाट पारित हुने अवस्था छैन।
न्यूज समय
२९ माघ, २०८१, मंगलबार ००:००