गोरखामा जन्ती बोकेको जीप दुर्घटना : पाँच जनाको मृत्यु

गोरखाको सहिदलखन गाउँपालिकामा हिजो जन्ती बोकेको जीप दुर्घटना हुँदा पाँच जनाको मृत्यु भएको छ । उनीहरु सबैको सनाखत भइसकेको प्रहरीले जनाएको छ । मृत्यु हुनेमध्ये ४ जना पुरुष र एक महिला छन् ।

सहिद लखन गाउँपालिका– ३ चिलिङकोटबाट हिजो अबेर बेहुली लिएर सोही गापाको वडा नं. ५ ताक्लुङ जाँदै गरेको ३–०१–०२३ च ४४२७ नम्बरको भाडाको जीप पात्लेखोलामा दुर्घटना भएको हो । जीप सडकबाट करिब २ सय ५० मिटर तल खोलामा पुगेको थियो ।

सो जीपमा सवार सहिद लखन गाउँपालिका–५ का प्रवीन थापा, वीरबहादुर थापा, निरज थापा र नविना थापा तथा वडा नं. ४ का थनबहादुर थापा ज्यान गएको गोरखा प्रहरीले जानकारी दिएको छ ।

दुर्घटनामा अन्य १२ जना घाइते छन् । उनीहरुमध्ये तीनजनाको अवस्था गम्भीर छ । उनीहरुलाई चितवनको भरतपुरमा लगिएको छ । अन्यको चितवनकै आँबुखैरेनीस्थित अस्पतालमा उपचार भइरहेको प्रहरीले जनाएको छ ।