पर्वतका विभिन्न स्थानमा आएको असिना पानीले धानाबालीमा क्षति
पर्वतका विभिन्न स्थानमा परेको असिना पानीले धानबालीमा क्षति पुर्याएको छ । धान पाकेर काट्ने तथा थन्काउने बेला परेको असिना पानीले गरेको नोक्सानीले किसानहरु चिन्तित बनेका छन् ।
जिल्लाका कुश्मा र फलेवास नगरपालिका, जलजला, मोदी र महाशिला गाउँपालिका लगाएतका स्थानमा असिना पानीले क्षति पुर्याएको स्थानीय कृषकहरुले बताएका छन् ।
कृषि ज्ञान केन्द्र पर्वतका प्रमुख परशुराम अधिकारीका अनुसार जिल्लाका अधिकांश क्षेत्रमा असिनापानीले क्षति पुर्याएको छ ।
अहिले स्थानीय तहहरूले तथ्याङ्क सङ्कलनको काम गरिरहेकाले केही दिनमा क्षतिको यकिन तथ्यांक आइपुग्ने प्रमुख अधिकारीले जानकारी दिए ।
प्रमुख अधिकारीले भने “यस वर्ष समयमै मनसुन भएकाले पर्वतमा राम्रो धानबाली फलेको थियो, तर काट्ने बेला तथा केही किसानले काटि पनि सकेको धानबालीलाई एक्कासी आएको असिना पानीले नोक्सान पुर्याएको छ” ।
यो बेलामा कतिपय जातका धानमा परागसेचनको काम हुने तर यही बेलामा हावा र वर्षाले फूल नै झारेपछि उत्पादनमा ह्रास आउन सक्ने पनि कार्यालय प्रमुख अधिकारीले बताए ।
