लुम्बिनी प्रदेश पूर्व मुख्यमन्त्री के.सी.ले फिर्ता गरे सरकारी गाडी, पूर्व सभामुख घर्तीले भने अझै प्रयोग गर्दै
लुम्बिनी प्रदेश सरकारले पूर्व विशिष्ट व्यक्तिहरूले पाउँदै आएको सेवा सुविधा फिर्ता लिने निर्णय संगै पूर्व–मुख्यमन्त्री कुलप्रसाद के.सी.ले चढदै आएको सरकारी गाडी फिर्ता गरेका छन् ।
पूर्व विशिष्टहरुलाई लुम्बिनी प्रदेश सरकारले दिएको गाडी फिर्ता गर्न ताकेता गरिएको भएपनि पूर्व–मुख्यमन्त्री केसीले त्यसलाई व्यवस्त गर्दै आएका थिए ।
सोहि कुरालाई मध्यनजर गर्दै नवनियुक्त मुख्यमन्त्री चेतनारायण आचार्य आफु मुख्यमन्त्री भएपछि गत भदौ ६ गते बसेको मन्त्रिपरिषद् बैठकबाटै पूर्व विशिष्ट व्यक्तिहरूलाई दिँदै आएको सेवा सुविधा फिर्ता लिने निर्णय गरे पछि केसीले सरकारी गाडी फिर्ता गरेका हुन् ।
मुख्यमन्त्री के.सी.ले पद खुस्किय पनि लु १ झ ७४५ नम्बरको सरकारी स्कार्पियो गाडी प्रयोग गर्दै आएका थिए ।
त्यस्तै पूर्व सभामुख पूर्णबहादुर घर्तीले भने लुम्बिनी प्रदेश सरकारले दिएको गाडी अझै फिर्ता नगरेको बताईएको छ ।
प्रदेश सभामुख हुँदा घर्तीलाई प्रदेश सरकारले लु १ झ ४४४ नम्बरको गाडी प्रयोग गर्न दिएको थियो ।
२०७४ फागुन २ गतेदेखि २०७९ पुससम्म ५ वर्ष प्रदेशसभाको सभामुख बनेका घर्ती हाल प्रतिनिधिसभा सदस्य छन् ।
