लोकतन्त्रले मात्र सबै वर्ग, क्षेत्र, लिङ्ग, वर्ण वा समुदायको हकहितको रक्षा गर्दछ

नेपालको लोकतान्त्रिक आन्दोलनमा अपाङ्गता भएका व्यक्तिहरुको महत्वपूर्ण योगदान रहेको छ । नेपाललाई आधुनिक विकासको बाटोमा अघि बढाउने क्रममा उनीहरुको उत्प्रेरणा, सुझाव, सहयोग र सकारात्मक भूमिका सदा प्रशंसायुक्त रह्यो । २००७ सालको जनक्रान्तिदेखि आजसम्म शारीरिक, मानसिक, वौद्धिक तथा अन्य प्रकारको अपाङ्गताका वावजुद नेपाली कांग्रेसको आह्वान र नेतृत्वमा भएका संघर्षहरुमा साथ दिने सबैलाई स–सम्मान सम्झना गर्न चाहन्छु ।

लोकतन्त्रले मात्र सबै वर्ग, क्षेत्र, लिङ्ग, वर्ण वा समुदायको हकहितको रक्षा गर्दछ भन्ने कुरा नेपालको आफ्नै अनुभवले पनि प्रष्ट पारेको छ । २०४६ सालमा प्रजातन्त्र पुनस्र्थापना भएपछि मात्र अन्य क्षेत्रले झै अपाङ्गता भएका व्यक्तिहरुको अधिकार सुनिश्चित गर्न पनि नेपालमा ठोस कदम चालिएका हुन् । अपाङ्गता भएका व्यक्तिहरुको अधिकार सम्बन्धी अन्तराष्ट्रिय महासन्धीमा नेपालले शुरुमै हस्ताक्षर गरेको हो । अपाङ्गताको परिभाषा, वर्गीकरण, परिचय–पत्रको व्यवस्था, सामाजिक सुरक्षा भत्ताको शुरुवात तथा आवश्यक नीति, रणनीति, कार्ययोजनाहरु निर्माण भएका हुन् ।

नेपालको वर्तमान संविधान अपाङ्गता भएका व्यक्तिहरुको शिक्षा, स्वास्थ्य, रोजगारी, सहज र सुलभ जीवनयापनको पक्षमा उभिएको छ । अपाङ्गता भएका व्यक्तिहरुको मानव अधिकारप्रति संवेदनशील छ । सरकारले चाहेर पनि अपाङ्गता भएका व्यक्तिहरुलाई पर्याप्त सेवा सुविधा दिन नसकिरहेको तर्फ हामी सचेत छौं । मुलुकको आर्थिक विकाससँगै यस क्षेत्रको सेवा, सुविधा र रोजगारी अभिवृद्धिमा प्राथमिकता दिन हामी दृढ छौं ।

राष्ट्रिय लोकतान्त्रिक अपाङ्ग संघले नेपाली कांग्रेसको केन्द्रीय समितिले तोकेको निर्धारित समयसीमा भित्र तल्ला तहका अधिवेशन सम्पन्न गरी पहिलो केन्द्रीय महाधिवेशन सम्पन्न गर्न लागेकोमा सम्वद्ध सबैलाई धन्यवाद दिन चाहन्छु । महाधिवेशनले संघलाई संस्थागत रुपमा थप सक्तक्त बनाउँदै, समावेशी लोकतान्त्रिक अभियानलाई प्रवद्र्धन गर्न तथा अपाङ्गता भएका व्यक्तिहरुको हक, अधिकार र पहिचानलाई थप स्थापित गर्न दिशा मार्गनिर्देश गर्नेछ, शुभेच्छा व्यक्त गर्दछु ।

अपाङ्गता भएका व्यक्तिहरुको हक, अधिकारलाई थप सुनिश्चित गर्न यस राष्ट्रिय लोकतान्त्रिक अपाङ्ग संघले उठाएका सवाल र सुझावलाई कार्यान्वयन गराउँदै जाने तर्फ नेपाली कांग्रेस प्रतिवद्ध रहेको जानकारी गराउँदै यस ऐतिहासिक प्रथम केन्द्रीय महाधिवेशनको पूर्ण सफलताको कामना गर्दछु ।

राष्ट्रिय लोकतान्त्रिक अपाङ्ग संघको प्रथम राष्ट्रिय महाधिवेशनको उद्घाटन समारोहलाई सभापति देउवाले गरेको सम्बोधन