कोशीकी उपसभामुख सिर्जना काठमाडौं यात्रामा

सोमबार बिहानका लागि तय गरिएको कार्यव्यवस्था बैठकसमेत दिउँसोलाई सर्यो

कोशी प्रदेशसभाकी उपसभामुख सिर्जना दनुवार बिरामी बिदा लिएर काठमाडौं लागेसँगै सरकारको आयु पनि संकटमा परेको छ । उपसभामुखले अध्यक्षता गर्दा आवश्यक बहुमत पुगेर विश्वासको मत पाउने गणितीय हिसाबमा अब त्यो सम्भव नदेखिएको हो ।

कोशी प्रदेशका मुख्यमन्त्री उद्धव थापाले सोमबार दिउँसो १ बजेका लागि विश्वासको मत लिने कार्यसूची तय भएको थियो । तर सो बैठकको अध्यक्षता नगर्नेकै लागि बिरामी बिदा लिएर उपसभामुख काठमाडौं लागेकी छन् ।

एमालेबाट निर्वाचित उपसभामुख दनुवार सोमबार बिहानै एति एयरलाइन्सको पहिलो उडानबाट काठमाडौं गएकी हुन् । दनुवार आइतबार बेलुका नै काठमाडौं जान खोजेकी थिइन् । तर गाडीमा जान अलि असहज भएपछि सोमबारको पहिलो फ्लाइटमा गएकी थिइन् ।

एमाले प्रमुख सचेतक रेवतीरमण भण्डारीले अचानक स्वास्थ्यमा समस्या देखिएपछि उपसभामुख बिहान ८ बजेको फ्लाइटमा काठमाडौं गएको सञ्चारकर्मीहरुलाई बताए । कांग्रेस सांसद इस्राइल मन्सुरीलाई बैठक सञ्चालन गर्ने जिम्मेवारी दिएर उपसभामुख काठमाडौं गएको उनले जानकारी दिए ।

प्रदेशसभाका ९३ सांसदमध्ये गठबन्धनमा ४७ मात्र छन् । यो संख्या झिनो बहुमत हो तर कांग्रेस सांसद मन्सुरीले बैठक सञ्चालन गरे मुख्यमन्त्री थापाले विश्वासको मत लगभग नपाउने पक्का भएको छ ।

सभामुख र उपसभामुख नभएको अवस्थामा अध्यक्ष मण्डलका सदस्यले बैठक सञ्चालन गर्नुपर्छ । प्रदेशसभा सञ्चालनका लागि सभामुख र उपसभामुखलाई सहयोग गर्न चार सदस्यीय अध्यक्ष मण्डल छ ।

अध्यक्ष मण्डलका जेष्ठ सदस्य एमाले प्रदेशसभा सदस्य मालती सुब्बा पनि केही दिन बैठकमा उपस्थित हुन नसक्ने भन्दै निवेदन दिएर बिदामा छिन् । अध्यक्ष मण्डलमा उनी पछिको ज्येष्ठ सदस्य राप्रपाका अम्बरबहादुर विष्टले पनि हिजो नै अनुपस्थित हुने बताएका छन् । अध्यक्ष मण्डलमा कांग्रेसका इस्राइल मन्सुरी र माओवादी केन्द्रकी गीता तिम्सिना सदस्य छन् ।

आजको बैठकमा अनुपस्थित हुन नेकपा एमाले र राप्रपाले आफ्ना ज्येष्ठ सदस्यहरूलाई निर्देशन दिएका छन् । दलको निर्देशनपछि एमालेका ७ र राप्रपाका एक सांसदले जरुरी घरायसी काम परेको भन्दै केही दिन बैठकमा उपस्थित हुन नसक्ने निवेदन संसद सचिवालयमा बुझाएका छन् ।

कोशी प्रदेशसभामा मुख्यमन्त्री थापाको नेतृत्वमा रहेको सरकारलाई कांग्रेसका २९, माओवादी केन्द्रका १३, नेकपा एकीकृत समाजवादीका ४ र जसपाको एक गरी ४७ सांसदको समर्थन छ, जुन कठिन बहुमत हो । उनको विपक्षमा एमालेका उपसभामुखबाहेक ३९ र राप्रपाको ६ जना सांसद छन् ।

संविधानको धारा १६८ को २ अनुसार गत साउन १६ गते सभामुख बाबुराम गौतमलाई राजीनामा गराएर थापा दोस्रो पटक मुख्यमन्त्री नियुक्त भएका थिए । उनले विश्वासको मत नपाए सोही धाराको उपधारा ३ अनुसार ठूलो दल एमालेका नेता हिक्मतकुमार कार्की मुख्यमन्त्री बन्नेछन् ।

वर्तमान सरकार ढालेर आफ्नो नेतृत्वमा सरकार बनाउने एमालेको रणनीतिअनुसार जेष्ठ सदस्यहरुलाई बिदामा राखिएको हो ।