निर्वाचन आयोगद्वारा स्थानीय तह निर्वाचनको चाँडो मिति तोक्न सरकारलाई आग्रह

निर्वाचन आयोगद्वारा स्थानीय तह निर्वाचनको चाँडो मिति तोक्न सरकारलाई आग्रह
निर्वाचन आयोगले सरकारलाई स्थानीय तहको निर्वाचनको मिति यथाशीघ्र तोक्न आग्रह गरेको छ ।
आयोगका प्रवक्ता शालिग्राम शर्मा पौडेलद्वारा मंगलबार हस्ताक्षरित जारी विज्ञप्तिमा निर्वाचनको मिति तोक्न ढिला गर्दा व्यवस्थापनमा समस्या पर्ने भन्दै चाँडो मिति तोक्न आग्रह गरिएको छ ।
आयोगले गएको कात्तिकमा प्रधानमन्त्री शेरबहादुर देउवालाई भेटेर स्थानीय तहको निर्वाचन एकै चरणमा गर्ने भए आगामी वैशाख १४ गते र दुई चरणमा गर्ने भए १४ र २२ गते गर्ने गरी मिति तोक्न सुझाई सकेको छ ।
निर्वाचनका लागि मिति तोक्न पटक पटक ताकेता गर्दै आएको आयोगले स्थानीय तह निर्वाचन ऐन अनुसार पहिलो चरणमा भएको निर्वाचनको मितिलाई आधार मानेर आगामी जेठ ५ गतेभित्र स्थानीय तहको निर्वाचन भइसक्नुपर्ने संवैधानिक र कानुनी बाध्यता रहेको बताएको छ ।
आयोगले यस अघि २०७४ सालमा वैशाख ३१ गते पहिलो चरण, असार १४ गते दोस्रो चरण र असोज २ गते तेस्रो चरण गरी तीन चरणमा स्थानीय तहको निर्वाचन सम्पन्न गरेको थियो ।