काठमाडौँ उपत्यका ट्राफिक प्रहरी कार्यालयले कीर्तिपुरस्थित त्रिभुवन विश्वविद्यालयको प्रवेशद्वार क्षेत्रमा सञ्चालन गरेको विशेष चेकिङका क्रममा १७ वटा सवारीसाधनका चालकलाई कारबाही गरेको छ ।
सडक सुरक्षा र दुर्घटना न्यूनीकरण गर्ने उद्देश्यले गरिएको उक्त अभियानमा ४७ वटा सवारीसाधनको प्राविधिक परीक्षण गरिएको थियो । जाँचका क्रममा कतिपय सवारीको ह्याण्डब्रेक दुरुस्त नभएको, लाइट बिग्रिएको र टायर अत्यधिक खिइएको पाइएकाले ती सवारीलाई कारबाही गरिएको प्रहरीले जनाएको छ ।
कार्यालयका प्रवक्ता प्रहरी उपरीक्षक नरेशराज सुवेदीले यान्त्रिक रूपमा कमजोर सवारीसाधन सडक सुरक्षाका लागि चुनौती भएको बताए । “हाम्रो उद्देश्य जरिवाना गर्नु मात्र नभई सम्भावित दुर्घटना रोकेर नागरिकको जीवन रक्षा गर्नु हो,“ उनको भनाई थियो ।
पछिल्लो समय सवारीसाधनको प्राविधिक खराबीका कारण दुर्घटना बढ्दै गएकाले ट्राफिक प्रहरीले नियमित मर्मत गरेर मात्र सवारी सञ्चालन गर्न चालक तथा व्यवसायीलाई आग्रह गरेको छ । यस्ता अभियानलाई उपत्यकाका अन्य स्थानमा पनि निरन्तरता दिइने प्रहरीले जनाएको छ ।
न्यूज समय
१ जेष्ठ, २०८३, शुक्रबार ००:००