गत शुक्रबार गएको शक्तिशालि भूकम्पबाट प्रभावित म्यानमारमा नेपालका तर्फबाट मेडिकल राहतसहित नेपाली सेनाको जहाज बुधबार बिहान त्यसतर्फ जानेभएको छ । नेपाली सेनाको जहाज बंगलादेश हुँदै त्यसतर्फ जाने लागेको नेपाली सेनाले जनाएको छ । सोमबारको मन्त्रिपरिषद बैठकले भुकम्प प्रभावित म्यान्मारमा राहतसहित नेपाली सेना पठाउने निर्णय गरेको थियो ।
म्यानमारको मध्यक्षेत्रमा ७.७ म्याग्निच्यूडको विनाशकारी भूकम्प गएको थियो । जसमा सोमबारसम्म कम्तीमा २७ सय मानिसको ज्यान गएको र ४५ सय बढी घाइते भएको तथ्यांक सार्वजनिक भएको छ । सैनिक प्रवक्ता गौरवकुमार केसीका अनुसार, टर्बोप्रोप इन्जिन भएको सेनाको सीएन–२३५ विमान राहत बोकेर म्यानमार जान लागेको हो ।
सैनिक उडानबाट मेडिकल टिम र सेनाका उद्धारविज्ञहरुसहित १६ जनाको हाराहारीमा टोली रहेको नेपाली सेनाले जनाएको छ । कूटनैतिक उडानका रुपमा सेनाको जहाजलाई मंगलबार नेपाल नागरिक उड्डयन प्राधिकरणले पनि अनुमति जारी गरिसकेको स्रोतले बतायो ।
यो उडानमा सेनाका पाइलट सहायक रथी रामसुन्दर बोहोरासहित ५ जना चालकदलको टोली म्यानमार जाँदै छ । जहाजमा १६ जनामध्ये १२ जना सेनाकै मेडिकल टोली रहेका छन् । यो विमान बिहीबार नेपाल फर्किने छ । तर सैनिक मेडिकल र अरु उद्धारकर्मीहरु त्यही रहने छन् ।
न्यूज समय
२० चैत्र, २०८१, बुधबार ००:००