चोरी भई अमेरिका पुगेर नेपाल फिर्ता गरिएको २१ वटा मुर्ति पाटन राष्ट्रिय संग्राहलयलाई हस्तान्तरण

न्यूज समय

नेपालबाट विगतमा चोरी भएर अमेरिका पुगेका थप २१ वटा पुरातात्विक महत्वका मूर्तिहरू संस्कृति पर्यटन तथा नागरिक उड्डनमन्त्री बद्री पाण्डेले पाटन संग्रालयष् र राष्ट्रिय संग्रालयलाई हस्तान्तरण गरेका छन् । सो अवसरमा मन्त्री पाण्डेले नेपालबाट चोरी भएर संसारको जुनसुकै कुनामा पुगेको भए पनि फिर्ता ल्याएरै छोड्ने वचनवद्धता व्यक्त गरे ।

उनले विगतमा नेपालका महत्वपूर्ण पुरातात्विक मुर्तिहरु कसरी विदेश पुगे भन्दै प्रश्न गरे । पाण्डेले शक्तिशालीहरूले नेपालका मुर्तिहरू चोरी गरेर जहाज मार्फत ठूलो सेटिङमा विदेशमा पुगाउने दुसाहास गरेको उल्लेख गर्दै गएका सम्पूर्ण मुर्तिहरु नेपाल फर्काइने विश्वास दिलाए । उनले जुन ठाउँबाट चोरी भएका हुन् सोही ठाउँमा उक्त मुर्तिहरु प्रतिस्थापन गरिने विश्वास व्यक्त गरे ।

संस्कृति,पर्यटन तथा नागरिक उड्डनमन्त्रालय मातहतमा रहेको पुरातत्व विभागले हालसम्म बेलायत, अष्ट्रिया, अमेरिका, चीन, तिब्त, भारत, जर्मनी, अष्ट्रेलिया र इटलीबाट जम्मा १७७ थान पुरातात्विक महत्वका मुर्तिहरु नयाँ कलात्मक वस्तुहरु विभिन्न राष्ट्रिय अन्तर्राष्ट्रिय व्यक्ति तथा संघ संस्थाहरुको प्रयासबाट फिर्ता भइसकेको जनाएको छ ।

अमेरिका फान्स बेलायत, चीन, अष्ट्रिया, अष्ट्रिलियाजस्ता देशहरुबाट थप अरु मुर्तिहरु फिर्ताका लागि कुटनीतिक पहल भइरहेको बताएको छ । हालसम्म संयुक्त राज्य अमेरिकाबाट मात्र नेपालमा फिर्ता भएका प्रातात्विक महत्व भएका वस्तुहरुको संख्या १०४  पुगेको छ ।