पानी मान्छेको दैनिक जीवनको आवश्यकता मात्र होइन आर्थिक समृद्धिको वाहक हो : मन्त्री खड्का

ऊर्जा, जलश्रोत तथा सिँचाईमन्त्री दीपक खड्काले पानी मान्छेको दैनिक जीवनको आवश्यकता मात्र नभई आर्थिक समृद्धिको वाहक भएको बताएका छन् । काठमाडौँमा शनिवार आयोजित एक कार्यक्रमलाई सम्बोधन गर्दै उनले पानीको प्रयोग गरेर देशलाई समृद्ध बनाउने, रोजगारी सिर्जना गर्ने लक्ष्यका साथ सरकार अघि बढिरहेको बताए ।

मन्त्री खड्काले पानीको सही सदुपयोगबाट मुलुकले क्रान्तिकारी समृद्धि हासिल गर्नसक्ने बताए । उनले पानी दैनिक जीवनको मात्र नभई आर्थिक समृद्धिको वाहक भएको बताए । पानीको प्रयोग गरेर देशलाई समृद्ध बनाउने, रोजगारी सिर्जना गर्ने लक्ष्यका साथ सरकार अघि बढिरहेको बताए । ऊर्जामन्त्री खड्काले जलश्रोतहरू नेपालको संस्कृति, सभ्यता र आर्थिक विकासको मेरुदण्ड भएको जिकिर गरे ।

जलवायु परिवर्तनका कारण विश्व पानी चक्रमा नै परिवर्तन आएको भन्दै उनले हिमनदीहरू खुम्चिँदै जानुले हिमताल फुट्ने जोखिम वृद्धि भएको उल्लेख गरे । मन्त्री खड्काले बेमौसमी वर्षाले कृषि क्षेत्रमा धेरै असर पुगेको र त्यसले जलश्रोत व्यवस्थापन र भविष्यको जल सुरक्षामा गम्भीर चुनौती उत्पन्न गरेको बताए । जलश्रोत रणनीतिको लागि राज्यले आवश्यक योजना बनाउन जरुरी रहेको उनको भनाइ थियो ।