संघीय संसद सचिवालयका कर्मचारीहरूको मागका विषयमा सम्बोधन गर्न समिति गठन
संघीय संसद सचिवालयका कर्मचारीहरूको मागका विषयमा सम्बोधन गर्न कानुन मन्त्रीको संयोजकत्वमा एक समिति गठन
आन्दोलनरत संघीय संसद सचिवालयका कर्मचारीहरूको माग सम्बोधन गर्न सरकारले एक समिति गठन गरेको छ ।
माननीय कानुन् मन्त्री पदम गिरीको नेतृत्वमा गठित ३ सदस्यीय समितिले कर्मचारीले उठाउँदै आएका ११ बुँदे माग सम्बोधन गर्ने विषयमा सहजिकरण गर्ने छ ।
गठित समितिका अन्य सदस्यहरुमा संघीय संसदका महासचिव पद्मप्रसाद पाण्डेय र अर्थ सचिव मधुकुमार मरासिनी रहेका छन् ।
कर्मचारीका मागका विषयमा आजै सभामुख देवराज घिमिरे र राष्ट्रिय सभा अध्यक्ष नारायणप्रसाद दाहालले प्रधानमन्त्री पुष्पकमल दाहाल ’प्रचण्ड’ संग छलफल गरेका थिए ।
छलफलमा अर्थमन्त्री वर्षमान पुन, कानून मन्त्री गिरी, माओवादीका मुख्य सचेतक हितराज पाण्डे, मुख्यसचिव बैकुण्ठ अर्याल र संघीय संसदका महासचिव पाण्डेयको पनि सहभागीत रहेको थियो ।
यसअघि असार ३ गते पनि सभामुख, राष्ट्रिय सभा अध्यक्ष, उपसभामुखले दलका प्रमुख सचेतकहरू सँग संघीय संसद सचिवालयका कर्मचारीहरुले राखेको माग सम्बोधन गर्ने विषयमा छलफल गरेका थिए ।
कार्यालय समय बाहेक अतिरिक्त समयमा काम गरे बापत सेवा सुविधा माग गर्दै संसद सचिवालयका कर्मचारीहरू गत जेठ २१ गतेदेखि निरन्तर आन्दोलनमा छन् ।
