दुई दिने नेपाल भ्रमण सकेर कतारका राजाअमिर थानी स्वदेश फर्किए

नेपालको दुई दिने राजकीय भ्रमणमा आएका कतारका राजा अमिर शेख तमिम विन हमाद अल थानी बुधबार दिउँसो स्वदेश फर्किएका छन् ।
अमिर थानीलाई राष्ट्रपति पौडेलले त्रिभुवन अन्तर्राष्ट्रिय विमानस्थलको अति विशिष्ट कक्षमा बिदाई गरे ।
विदाई कार्यक्रममा उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल प्रचण्ड, सभामुख, राष्ट्रियसभाका अध्यक्ष, उप–प्रधानमन्त्री, मन्त्री एवम् परराष्ट्र मन्त्रालयका उच्च पदाधिकारीहरूको उपस्थिति थियो ।
त्यस अवसरमा नेपाली सेनाले अमिर थानीलाई सम्मानका साथ २१ तोपको सलामी अर्पण गरेको थियो ।
राष्ट्रपति पौडेलको मैत्रीपूर्ण निमन्त्रणामा नेपालको दुई दिने राजकीय भ्रमणमा अमिर थानी मङगलबार अपरान्ह नेपाल आएका थिए ।
कतारका अमिर थानीको यो पहिलो पटक नेपाल भ्रमण भएकोले उनको आगमनमा नेपाल सरकारले मङ्गलबार सार्वजनिक बिदा समेत दिएको थियो ।

दुई दिन नेपाल बसाईका क्रममा अमिर थानीले प्रधानमन्त्री पुष्पकमल दाहाल, मन्त्री तथा नेपालका उच्च ओहदाका पदाधिकारी संग दुई देश वीचको सौहाद्रपूर्ण सम्बन्धका विषयमा छलफल भएको थियो ।

अमिर थानी मंगलबार राष्ट्रपति पौडेलले आयोजना गरेको रात्रि भोज तथा प्रधानमन्त्री दाहालले बुधबार गरेको दिवा भोजमा सरिक भएका थिए ।