क्वीन्टल सुन प्रकरणमा पूर्वउपराष्ट्रपति पुनका सुपुत्र पनि तानिए

ठेक्कापट्टामा पछिल्लो समय नेपालको बजारमा चर्चित व्यक्ति दीपेश पुनलाई प्रहरीको केन्द्रीय अनुसन्धान ब्यूरो (सीआईबी) ले बयानका लागि कार्यालयमै उपस्थित गराएको छ । उनी पूर्वउपराष्ट्रपति नन्दकिशोर पुनका सहोदर छोरा हुन् ।

दीपेशले आज महाराजगञ्जस्थित ब्यूरो कार्यालय पुगेर बयान दिएको प्रहरी स्रोतले जनाएकोछ । क्वीन्टल सुन तस्करी प्रकरणमा तानिएका व्यक्तिहरुसँग उनको राम्रै उठवस देखिएपछि सीआईबीले बयान लिएको हो ।

पछिल्लो समय ठूला व्यापारिक गतिविधिमा दीपेशको नामले नै काफी हुने भन्ने भनाइ छ । यस प्रकारका कार्यहरुमा उनको सल्लाह, सहमति र निर्देशनबिना काम भए अवैध नै मानिने यस क्षेत्रका जानकारहरु बताउँछन् ।

राजश्व अनुसन्धान विभागले साउन ३ गते लुकाएर ल्याइएको भनिएको १५५ किलो ब्रेक शू बरामद गरेको थियो । यही ब्रेक शूलाई गाल्दा पछि झन्डै ६१ किलो पहेँलो धातु सुन निस्किएको हो ।

बरामद राजश्वले गरेर छानबिन पनि उसैले गरिरहँदा १९ दिनपछि मात्रै अनुुसन्धानको सम्पूर्ण जिम्मा सीआईबीलाई हस्तान्तरण गरिएको थियो । त्यसक्रममा यसमा संलग्न ६ विदेशी नागरिकसहित २५ जनालाई प्रहरीले नियन्त्रणमा लिएको छ ।

घटनाका सबैभन्दा चल्तीका व्यक्ति चिनियाँ मूलका बेल्जियन नागरिक दावा छिरिङको माओवादी नेताहरुसँग राम्रै उठबस भएको देखिएको छ । उनले रोल्पाकी माओवादी नेतृ अमला रोकासँग विवाह गरेका छन् ।

उता भेपमार्फत तस्करी भएको ९ किलो सुन प्रकरणमा पनि पूर्वसभामुख कृष्णबहादुर महराका छोरा राहुल पनि यतिबेलासम्म प्रहरी हिरासतमै छन् ।