कोशीमा विश्वासको मत संविधान सम्मत भएन : नेता कोइराला
प्रदेश सभामा अध्यक्षता गर्दै गर्दाको भोट प्रयोग गर्नु भन्ने गठबन्धनका शीर्ष नेताहरूको अडान लोकतान्त्रिक पद्धतिभन्दा बाहिरको कुरा हो
कोशी प्रदेशका मुख्यमन्त्री उद्धव थापाले बलजफ्ती बहुमत पुर्याएर विश्वासको मत लिएका छन् । सभाध्यक्षको भोट लिएर यसपटक पनि थापाले बहुमत देखाए ।
यसअघि पनि सभामुखको हस्ताक्षर अंकित बहुमत दाबीबाट थापा मुख्यमन्त्रीको पद लिएका थिए तर सर्वोच्चले असंवैधानिक भनेपछि सत्ताबाट हट्नु परेको थियो । अदालतको आदेशपछि सभामुखलाई राजीनामा गराएर उनी पुनः मुख्यमन्त्री बनेका छन् ।
विश्वासको मत ३० दिनभित्र लिनुपर्ने प्रावधानअनुसार उनले पुनः सभाध्यक्षको मत प्रयोग गरे । यसमा विपक्षीमात्र होइन, उनकै पार्टीका वरिष्ठ नेताले समेत चित्त बुझाएन र मिडियामा आए । अहिले पार्टीभित्र नै उनको आलोचना हुन थालेको छ ।
कांग्रेस नेता एवं सांसद शेखर कोइरालाले थापाले विश्वासको मत लिन सभाध्यक्षको भोट प्रयोग गर्नु असंवैधानिक भएको प्रतिक्रिया दिएका छन् । गृहनगर विराटनगर आइपुगेका कोइलाराले मंगलबार पत्रकारहरूसँग कुरा गर्दै मुख्यमन्त्रीबाट फेरि पनि असंवैधानिक क्रियाकलाप भएको जिकिर गरे ।
सभामुखको भूमिकामा रहेका सदस्यले मत लिएर म प्रति संसदको विश्वास छ भन्नु संविधानविपरीत भएको उनले ठहर छ । गठबन्धनबाट भएको यस कामको व्याख्या पुनः सर्वोच्च अदालतले नै गर्नुपर्नेसमेत उनको भनाइ छ ।
सम्मानित अदालतको निर्णय सबैले स्वीकार्नुपर्ने बताउँदै नेता कोइरालाले यसमा सत्ता गठबन्धनका शीर्ष नेताहरूलाई समेत दोष दिएका छन् । शीर्ष नेताबाट यस्तो निर्णय गराएर बद्नाम तरिकाले विश्वसको मत लिनु भन्नु अत्यन्तै लोकतान्त्रिक पद्धतिभन्दा बाहिर गएको छ ।
यति भइसकेपछि सर्वोच्चले जे निर्णय गर्छ त्यसलाई स्वीकार्नुपर्ने सबैको कर्तव्य हुने कोइरालाको भनाइ छ । सत्ता गठबन्धन पटकपटक संविधान मिच्ने र प्रमुख प्रतिपक्षी अदालतमा गएर न्याय खोजिरहनु पर्ने राम्रो काम होइन । जब राज्यसत्ता कमजोर हुन्छ त्यो बेला अदालत सक्रिय हुन्छ र त्यसलाई जुडिसीयल एक्टिभिजम भन्नु गलत भएको उनको भनाइ थियो ।
