शनिबार बिहानै धादिङमा ठूलो सडक दुर्घटना

धादिङको बेनिघाट रोराङ गाउँपालिका– ९ हुग्दीखोला नजिक यात्रु बस दुर्घटना हुँदा २६ जना यात्रु घाइते भएका छन् । उनीहरुमध्ये ३ जनाको अवस्था चिन्ताजनक छ ।

दाङको तुलसीपुरबाट काठमाडौँ आउँदै बाप्र ०३–००१ ख २६७५ नम्बरको रात्रिबस शनिबार बिहानसडकको दाहिनेतर्फ पल्टिएको हो । प्रहरीका अनुसार दाहिनेतर्फ सडकको ढलमा बस अडिएकाले ठूलो मानवीय क्षति हुन पाएन ।

बिहान ५ बजे तिर दुर्घटनाग्रस्त बसका घाइते पाँच जनालाई थप उपचारका लागि काठमाडौँ पठाइएको
छ । अन्य घाइतेको भने मलेखुस्थित राजमार्ग अस्पताल र नजिकका स्वास्थ्य संस्थामा उपचार भइरहेको प्रहरीले जनाएको छ ।

दुर्घटनाका घाइतेमध्ये सल्यान सबेश्वरी ३ का राजेन्द्र पुन, ६ वर्षीय आशीष केसी र सल्यान बाघचौर नगरपालिका १० का मानबहादुर खड्काको अवस्था गम्भीर छ । घाइतेहरुको प्रहरी र स्थानीयले उद्धार गरेर स्वास्थ्य संस्था पठाएका थिए ।