कांग्रेस केन्द्रीय कार्यसमिति बैठक सकिँदै, सभापतिको जवाफी मन्तव्य
साउन २ गतेबाट जारी नेपाली कांग्रेस केन्द्रीय कार्यसमिति बैठक सम्भवतः आज साँझबाट सकिँदैछ । ललितपुरको सानेपास्थित मुख्यालय बीपी स्मृति भवनमा साँझ ४ बजेका लागि बोलाइएको बैठकलाई सभापति शेरबहादुर देउवाले सम्बोधन गर्ने छन् ।
कांग्रेसको जारी बैठकमा यसअघि केन्द्रीय सदस्य र पदाधिकारीहरुले आफ्ना धारणा राखिसकेका छन् । बैठकमा उठेका सवालहरुको सभापतिले आज सम्बोधन गर्ने कार्यक्रम छ । बैठकमा केन्द्रीय सदस्यहरूले राखेका धारणा तथा छलफलका विषयलाई निष्कर्षसहित सभापतिले जवाफ दिने कार्यक्रम छ ।
बैठकका निर्णयहरुको अन्तिम टुंगो लगाउनका लागि आजै बिहान ११ बजे पदाधिकारीहरुको बैठक सभापति शेरबहादुर देउवा निवास धुम्बाराहीमा डाकिएको छ । केन्द्रीय कार्यसमितिको बैठक समापनअघि बैठकबाट गर्ने निर्णयलाई अन्तिम रुपसमेत दिइने छ।
आज बिहानको पदाधिकारी बैठकमा मस्यौदा पेस गरेर सभापति र महामन्त्रीहरुले निर्णयको मस्यौदालाई अन्तिम रुप दिने छन् । सोही मस्यौदालाई अनुमोदनका लागि केन्द्रीय समिति बैठकमा प्रस्तुत गरिने छ ।
