राप्रपाको संसदीय दलमा लिङ्देनलाई बाइपास गर्ने तयारी, पशुपतिशम्सेर बलिया देखिए

पटक पटकको फुटले अस्तित्व नै संकटमा पर्न लागेको पूर्वपञ्चहरुको पार्टी राष्ट्रिय प्रजातन्त्र पार्टी (राप्रपा) मा फेरि द्धन्द चर्कने संकेत देखिएको छ । अस्तित्व नै संकटमा पर्न लागेको राप्रपालाई अध्यक्ष राजेन्द्र लिङ्देनले पुर्नजिवन दिएका छन् । लिङ्देनको मेहनतका कारण एमालेसंग मिलेर प्रत्यक्ष तर्फ ७ सिटमा जीत निकालेको छ भने समानुपातिक तर्फपनि ७ सिट आउने देखिएको छ । संसदमा १४ सिट हुने राप्रपामा अध्यक्ष लिङदेनलाई संसदीय दलको नेता बन्न नदिने खेल सुरु भएको छ । लिङ्देनको सट्टा पशुपतिशमशेर जबरा संसदीय दलको नेता बनाउने तयारीमा राप्रपाका पुराना नेताहरु लागेका छन् ।

संसदीय दलको अंकगणितमा पनि लिङ्देन भन्दा राणा बलिया देखिएका छन् । प्रत्यक्ष निर्वाचन जितेका ७ जनामध्ये ५ जना राणलाई संसदीय दलको नेता बनाउन लागेका छन् । धवलशमशेर जबरा, विक्रम पाण्डे, दीपकबहादुर सिंह, ध्रुवबहादुर प्रधान, दिपक बोहोराले अध्यक्ष लिङ्देनको सट्टा पशुपतिशमशेरलाई संसदीय दलको नेता बनाउने अभियानमा छन् । राप्रपाले समानुपातिकबाट पाउने ७ सिटमध्ये ४ जना महिला सांसद बन्नेछन् । निर्वाचन आयोगमा बुझाइएको सुची अनुसार ४ जना महिलामा रोशन कार्की, गीता बस्नेत, बिना लामा र अनिसा परियार सांसद बन्ने देखिएको छ । बाँकी रहेका तीन पुरुषमध्ये खस आर्यबाट पशुपतिशमशेर, जनजातिबाट बुद्धिमान तामाङ र मधेशी समुदायबाट प्रल्हादप्रसाद साह सांसद बन्न सक्छन् ।

यी ७ मध्ये अध्यक्ष लिङ्देनलाई संसदीय दलको नेता बनाउनुपर्छ भन्ने तीनजना मात्रै देखिएका छन् । प्रल्हादप्रसाद साह, अनिसा परियार र गीता बस्नेत मात्र अध्यक्ष लिङदेनको पक्षमा उभिन सक्छन् । रोशन कार्की, बिना लामा, बुद्धिमान तामाङ पशुपतिशमशेरको पक्षमा देखिनेछन् । यदि संसदीय दलको निर्वाचन भयो भने १४ सांसदमध्ये ९ जना पशुपतिशमशेरको पक्षमा उभिने स्पष्ट देखिएको छ । ५ जना मात्र सांसद अध्यक्ष लिङ्देनको पक्षमा देखिएका छन् । प्रत्यक्षमा निर्वाचित ज्ञानेन्द्र शाही र लिङ्देन आफु मात्र संसदीय दलमा लिङ्देनको पक्षमा देखिनेछन् । पार्टीका सिनियर नेता पशुपतिशमशेर हुँदाहुँदै लिङ्देनलाई नेता नमान्ने भन्ने दम्भ पालायो भने राप्रपाभित्र फेरि द्वन्द्व चर्किने निश्चित छ ।