स्पेनिस ला लिगा फुटबलमा रियल मड्रिड विजयी
स्पेनिस ला लिगा फुटबलमा रियल मड्रिड विजयी भएको छ । गएराति भएको खेलमा एइबरलाई ३–१ ले हराउँदै रियलले शीर्ष स्थानको एथ्लेटिको मड्रिडसँग अंक बराबरी गरेको हो ।
एइबरको मैदानमा रियललाई जीत दिलाउन करिम बेन्जिमा, लुका मोड्रिक र लुकास भाज्क्वेजले एक एक गोल गरे भने एइबरका लागि किकेले एक गोल फर्काए ।
जीतपछि रियल मड्रिड दोस्रो स्थानमा उक्लिएको छ । उसको १४ खेलबाट २९ अंक छ भने दुई खेल कम खेलेको एथ्लेटिको मड्रिड २९ अंक जोडेर शीर्ष स्थानमा छ ।
पराजित भएको एइबर १५ अंकसहित १४ औं स्थानमा छ । गएराति नै भएका अन्य खेलमा सेल्टा डी भिगोले एलाभेस, ग्रानाडाले रियल बेटिस तथा गेटाफेले काडिजलाई समान २–० ले पराजित गरेका छन् ।
